احتراما لنفسنا

ليه نفرح بالنصر و النصر لسه مجاش؟ ليه نفرح باننا كسبنا معركة و الحرب شغالة؟ حرب بين شعب عايز حرية و كرامة و بين اللى بينصبوا نفسهم حكامنا و اللى بيهادونا زى العيال الصغيرة لحد ما نهدا و ترجع ريما لعاديتها الأديمة بتغيير فى حبة وشوش جنب الوشوش اللى بينها و بينا ذلنا و استبدادهم و دم و جرحى، لو اللى كسبناه من يوم ٢٥ يناير هو بس فرصة للتعبير عن كبتنا أو وعود من ناس قديمة شاركت فى ظلمنا انهم يلبسوا هدوم جديدة يبقى احنا فعلا عيال، اللى ينسى ان الجيش وقف على الحياد - و الحياد بين الظالم و المظلوم هو فعلا حياد - لحد الوقت اللى حس فيه المجلس الأعلى ان الجيش هينفرط يبقى بيهدى نفسه بأمانى مش هتحقق، و تتحقق ازاى لما نفس اللى وقف على الحياد هو اللى بيقلنا اهدوا انتوا و انا هظبط الديموقراطية بتعتكم ديه، على أساس انه عرفها يعنى، على أساس ان الجيش يفهم فى الكفت، صحيح ما هو فهم فى العيش ازاى بقى ما يفهمش تأسيس و تسيس و تلبيس الديموقراطية، بس ديه بقه ديموقراطية الشعب قاعد على الكراسى، و بما انه فاهم فى الكفت يبقى نتلم عشان الكبير بيتكلم ... عموما لو متلمتوش الشرطة العسكرية تضرب فيكم شوية و تطلع احتكاكات ... على انه مرض جلدى عند العساكر فلازم يهرشوا على قفى المعتصمين، على ان العسكرى ملوش قائد، و لا ان القائد ليه قائد و القائد فى الأخر هو اللى بيفهم فى الكفت وده طبعا المجلس الأعلى، ولا على أن قائد المجلس الأعلى هو الوزير اللى مبارك مغيروش فى أي وزارة أتغيرت فى ٢٠ سنة، ما هو كان النضيف فيهم عشان كده مبارك كان سيبه ينضف. و هل الجيش اعلى من الشعب بحيث يعتدى على الشعب بدون محسابة و عقاب؟

حضرة المصلح الديموقراطى شفيق - اللى هو تعيين مبارك قائد مسيرة الحرية و اللى هو برضه يكلم التلفزيون فى وسط البرنامج و يقطع البرنامج عشان الكلام مش عجبه حيث ان الكلام مضر بصحة الشعب و تفكيره على ان المحاور من اسطوات حضرته و الإعلام ملك سيادته و الضيف خروف من وسط اكتر من ٨٠ مليون خروف، المهم الملهم الديموقراطى مستر غاندى البصل بيعيين وزراء من المعارضة و رموز الإستقلالية فى دولة أتكلم اه أعمل حاجة أديك بالجزمة، بس الراجل ناصح و ادى فهمى فرصة ينضف أو يأشط وزارته قبل ما يمشى، ما الدليل لازم يموت و العالمه لازم تمشى، اما عن السيد الناشط الحقوقى راعى حقوق الأنسان و الحيوان كمان فى دولة أمن الدولة السيد وزير الداخلية اللى زوّد الحوافز للشرطة ١٠٠٪ و طلع قالك ان العناصر المندسة هما اللى اتضربوا بالنار فى المظاهرات أكيد فاكر ان المجرمين المنّدسين شهداء الثورة هما كلاب الحركة المتمردة بتاعت اللى بيقولوا عليها بالغلط ثورة، ما هى أكيد حركة ادام الملهم الديموقراطى شفيق بيقول عليها حركة و زاده تأكيد ان وزير الخارجية المعلم ابو الغيط اللى واخد السياسة دراع بيقول عليها حركة برده ... حركة العملاء بتوع كنتاكى. أحسن حاجو ان الموظف اللى أسمه وزير هيطمن الناس و اديها فتحة خير على أساس ان الداية قالت ديموقراطية و أكيد أى عميل ميطمنش الناس من الناس من الموظفيين الجداد هيترفد من عزبة الملهم و مجلس الكفت.

شرعية دول مين حد يفهمنى؟ شرعية الحركة العميلة و لا شرعية الدستور اللى اتعطل لأن الناس الخونة طلعوا ضده و لا شرعية الدراع و لا شرعية جايه من فين بالظبط؟ هما خافوا على البيه الدستور قالوا نداخله المستشفى و نعملوا عملية و لا اتنين هيطلع احسن من اجدعها شوال بطاطس، بس ده برضه مايجبش شرعية ليهم لان الدستور المرقع بتاعنا بيقول انهم يحافظوا على الدستور اما بالدستور فهوا رئيس المحكمة الدستورية اللى يحكم فى الأوضاع ديه بس هو دراع، دستور ايه اللى نحتكم ليه و الناس فى الشارع بتقول ميش عوزينه، الدستور اللى هو عبارة عن رؤية الشعب للمبادئ اللى بيحتكم ليها بيجى من الشعب مش كتاب لأيناه فى الشارع، ولما كان بيجى من الشعب و ان النظام رقعه على مزاجه و الشعب عليه ثار يبقى لازم يتغير و الانتخابات تتم على هدى الدستور الجديد اللى الشعب يوافق عليه مش فى هدى ترقيعة جديدة تخص الرئيس عيعد اد ايه و مالوش دعوة بصلاحيات الرئيس، بيقولوا هاتوا انتوا رئيس فى الانتخابات يبقى يغير، طيب و ليه مش دلوقتى؟ عشان اللى هيجى بالوضع الحالى هيبقى حد مدعوم بالنظام بعد تشويه كل اللى الناس هيشوفوا فيهم امل او بتلميع حبة حلوين من البيقولوا مبارك يتحاكم على ايه هو عمل ايه زى عمرو موسى وزير خارجية مبارك و الساكت عن ثورة ليبيا ٥ ايام، و كمان احزاب و قوى سياسية ايه اللى هتتولد فى ست شهور، العيل بيجى فى تسعة هنجيب احنا عصارة التاريخ فى ستة؟! و ليه مش مجلس رئاسى؟ ما هو المجلس ده هيركن المجلس الأعلى اللى فاهم فى الكفت و مدلع مبارك الرئيس السابق و ليس المخلوع و مظبط شفيق ملهم الديموقراطية بالذات فى الإعلام و سايب واحد زى وجدى بتاع القلة المندسة واللى مدير امنه بيقول على الشرطة أسيادنا و النايب العام اللى رفض التحقيق فى ألاف القضايا و اللى معينه مبارك و كمان المجلس الرئاسى و حكومة الإنقاذ الوطنى ممكن يجيبوا ديموقراطية بجد و الفاس تؤع فى الراس و كمان كده الناس تفهم انهم هما الشرعية مش حد تانى.

احتراما لنفسنا و للناس اللى اتصابت و اللى ماتيت نقعد فى التحرير و فى كل ميدان لحد ما اهدفنا تتحقق و تتحقق بأيدنا او بأيد اللى نخترهم مش بأيد وصى على إرادتنا و ناس بتستخف بعقولنا، ديه مش طلبات لأن الطلب يكون موجه للليه حق الرفض و الشعب هو الوحيد اللى ليه الحق داه، نختار مجلس رئاسي و نعلنه و نحطه يجيب حكومة و ديه هى الثورة